Boas e calorosas tardes #familiacantabile!
Esperamos que esteades a ter un inicio de verán tan marabilloso coma o noso! Pola nosa parte, non esaxeramos cando dicimos que o remate do curso escolar foi acompañado de incribles experiencias que procedemos a narrar a continuación coa elegante prosa que nos caracteriza.
En vésperas da Noite de San Xoan, e como estabamos un pouco tristes porque este ano non fariamos a nosa tradicional cacharela na praia de Riazor, decidimos ir ó Museo de Belas Artes para visitar a exposición adicada a Pablo Picasso. Desfrutamos dun marabilloso percorrido guiado no que tivemos-la posibilidade de coñecer máis sobre este artista formado na mesma Coruña.
Días máis tarde, e como xa é costume, celebramos o noso tradicional Concerto de Solistas, no que os nosos coralistas interpretaron pezas de Händel a Rimsky-Korsakov. Ademáis, contamos coa nosa querida Ludmila Orlova ó piano. Sen dúbida, un modo ideal de rematar o mes de xuño.
Comeza xullo, e non tivemos mellor forma de celebrar as altas temperaturas e os días de sol que coa Noite das Candeas, o noso tradicional concerto nocturno no que á luz das candeas celebrado no noso segundo fogar: a Igrexa das Capuchinas.
Nesta ocasión o repertorio, adicado a W. A. Mozart, contemplou tres dos seus fermosos nocturnos e unha selección de números da súa Misa de Réquiem. Foi un pracer para nós poder interpretar este marabilloso programa, o cal levamos xa traballando máis de un ano. Esperamos que dentro de moi pouco poidades escoitar esta fermosa misa na súa totalidade nos nosos concertos!
Xa para rematar, recentemente cantamos na Praza de Lugo con motivo do Orgullo 2023, onde interpretamos pezas coma “Can´t help falling in love” ou “Goodnight sweetheart” . Encántanos poder seguir participando neste evento un ano máis, aportando o noso graniño de area a toda a comunidade LGTBI+. Ademáis tivemo-la sorte de coñecer ó Coro Coruña Cores, formado recentemente e dirixido polo noso querido Pablo M. Carreira.
Como podedes ver, foi un inicio de verán cheo de experiencias apaixonantes, e esperamos que esa sexa a tónica xeral dos próximos meses, xa que temos por diante o noso esperado Cantabileando 2023: Asturias.
Desexámosvos un moi feliz verán, a poder ser cheo de música, e vémonos moi pronto #familiacantabile 🙂